Ընդդիմադիրը՝ վաշինգտոնյան պայմանավորվածությունների մասին. Խաղաղությունը հասանելի է և չափելի միայն այն դեպքում, եթե կողմերից ոչ մեկը մյուսի նկատմամբ ճնշում չի գործադրում

Արմինֆո.Խաղաղությունը հասանելի է և չափելի միայն այն դեպքում, եթե կողմերից ոչ մեկը մյուսի նկատմամբ ճնշում չի գործադրում: Սա դասական ճշմարտություն է և ցանկացած արդյունավետ բանակցությունների բանաձևը։ Այդ մասին սեպտեմբերի 3-ին լրագրողների հետ զրույցում հայտարարել է ԱԺ ընդդիմադիր "Հայաստան" խմբակցության քարտուղար Արծվիկ Մինասյանը ՝ անդրադառնալով օգոստոսի 8-ին Վաշինգտոնում Հայաստանի և Ադրբեջանի միջև նախաստորագրված խաղաղության համաձայնագրին։

Այդ համատեքստում նա արձանագրել է, որ եթե Հայաստանի իշխանությունների հռչակած "խաղաղությունը" չի փոխում Ադրբեջանի մոտեցումները Հայաստանի նկատմամբ վարվող քաղաքականության մեջ, ապա դա հերթական անգամ ապացուցում է, որ այն պատրանքային է: Դաշնակցականը հավելել է, որ ադրբեջանական կողմը, Հայաստանին հերթական զիջումը պարտադրելով, անցել է Հայաստանը գրավելու հաջորդ փուլին: "Իսկ այդ ժամանակ Հայաստանի վարչապետ Նիկոլ Փաշինյանը, պարզապես, վերաձևակերպել է ամբողջ միջազգային տերմինաբանությունը և մեկնաբանում է այն այնպես, ինչպես իրեն դուր է գալիս այս պահին",-կարծում է Մինասյանը:

Ինչպես ուշադրություն է հրավիրել խորհրդարանական խմբակցության քարտուղարը, մինչ օրս պարզ չէ, թե ինչ է պարունակում Ադրբեջանի հետ ստորագրված փաստաթուղթը։ Նա վստահ է, որ փաստաթուղթը, ամենայն հավանականությամբ, կազմված է այնպես, որ թշնամական կողմը կարողանա մեկնաբանել իր դրույթներն այնպես, ինչպես իրեն ձեռնտու է: "Եվ այդ դեպքում Հայաստանի իշխանությունները չեն կարող, պարզապես, հայտարարել, որ իրենց տեսանկյունից փաստաթղթում խոսք չկա "միջանցքի" մասին։ Ամբողջ հարցն այն է, թե ինչպես է դա գրված հենց այնտեղ, և ինչպես է մեկնաբանվելու", - նշել է Մինասյանը։

 Վերոգրյալի կապակցությամբ նա ուշադրություն է հրավիրել այն հանգամանքի վրա, որ միջազգային պայմանագրերի իրավունքի մասին Վիեննայի կոնվենցիան ապահովում է մեկնաբանման կոնկրետ կանոններ և ենթադրում է բանակցությունների բովանդակության հրապարակայնություն: "Իսկ մենք մինչև այսօր չունենք բանակցությունների բովանդակությունը բացահայտող փաստաթղթերի ամբողջական փաթեթ, որը հաստատել են երկու կողմերը։ Մեզ ընդամենը մի քանի փաստաթուղթ են ներկայացրել, այն էլ Նիկոլ Փաշինյանը մեկնաբանում է իր պատկերացումների շրջանակներում", - վրդովվել է դաշնակցականը։

Բացի այդ, նա հռետորական հարց է հնչեցրել, թե ինչպես կարելի է խոսել խաղաղության մասին Արցախի ողջ բնակչության բռնի տեղահանումից հետո, և երբ կողմերից մեկն իր արդյունքներին հասել է բռնության, ամենօրյա ռեժիմով սպառնալիքների և նվաստացումների միջոցով: "Նման պայմաններում խաղաղություն չի կարող լինել։ Երբ չկա ոչ մի երաշխիք, եւ չկա զսպման համակարգ, ապա ով եւ ինչպես է երաշխավորելու այն", - հարցրել է խորհրդարանականը։

Մինասյանը վստահ է, որ աշխարհի աշխարհաքաղաքական քարտեզի վրա ստեղծված իրավիճակը չի կարող այսօր ապահովել խաղաղության իրացումը, որի մասին խոսում են երկու երկրների ղեկավարները:

Անդրադառնալով երեկ Ազատության հրապարակում արցախցիների հանրահավաքին՝ նա այն կարևորել է միջազգային հանրությանը ցույց տալու տեսանկյունից, որ հայերի մեծ մասը հանձնառու է իր իրավունքին և համաձայն չէ Հայաստանի իշխանությունների վարած քաղաքականության հետ: "Հանրահավաքը մեծ նշանակություն ունեցավ հայաստանյան իշխանությունների ապազգային քաղաքականության ֆոնին, հատկապես՝ խաղաղության կեղծ օրակարգի շրջանակներում, ինչպես նաև ԵԱՀԿ Մինսկի խմբի լուծարման ֆոնին: Հանրահավաքով Արցախցիները ցույց տվեցին, որ վերադարձի իրավունքը չի կարող անտեսվել", - ընդգծել է Մինասյանը։

Այդ համատեքստում նա պատմել է, որ բազմաթիվ ազդակներ կան Հայաստանի և Արցախի բարեկամ շրջանակներից, որոնք վստահեցնում են, որ իշխանափոխության դեպքում արցախցիների վերադարձի հարցը կրկին կհայտնվի օրակարգում: "Դրանք բազմաթիվ են.  մեր Հայ դատի կենտրոնական գրասենյակի աշխատանքը ցույց է տալիս, որ շատ երկրներում տարբեր գործիչներ՝ թե քաղաքական, թե հասարակական, կարևորում են ժողովուրդների հիմնարար իրավունքների իրացումը ։ Նրանք իրենց պատրաստակամությունն են հայտնում համագործակցել այս հարցի շուրջ և այնպես անել, որ այն վերադարձվի միջազգային օրակարգ։ Իսկ ամենակարեւորն այն է, որ դրա շուրջ իրական գործողություններ իրականացվեն", - ասել է խորհրդարանականը։

Այս համատեքստում նա կարևորել է նաև երեկ համաժողովի անցկացումը, որին ներկա էին բազմաթիվ միջազգային փորձագետներ, որոնք վերահաստատեցին արցախցիների վերադառնալու իրավունքի անհերքելիությունը միջազգային մակարդակում:

Հիշեցնենք, որ երեկ Հայաստանի Ազատության հրապարակում տեղի է ունեցել արցախցիների միասնության մեծ հանրահավաք ՝ Լեռնային Ղարաբաղի Հանրապետության անկախության օրվա կապակցությամբ: Հանրահավաքի ընթացքում կրկին բարձրաձայնվել է արցախցիների վերադարձի և նրանց հիմնարար իրավունքների ապահովման իրավունքը:

Հավելենք, որ օգոստոսի 8-ին Սպիտակ տանը կայացել է ԱՄՆ-ի, Հայաստանի և Ադրբեջանի ղեկավարների եռակողմ հանդիպումը, որի շրջանակներում ՀՀ վարչապետ Նիկոլ Փաշինյանը, ԱՄՆ նախագահ Դոնալդ Թրամփը և Ադրբեջանի նախագահ Իլհամ Ալիևը ստորագրել են համատեղ հռչակագիր ՝ ուղղված Երևանի և Բաքվի միջև հակամարտության կարգավորմանը: