ՊՆ նախկին փոխնախարար․ Երկրի իշխանություններն ի վիճակի չեն նոր պայմաններ ստեղծել երկրի անվտանգության համար

Արմինֆո. Արցախի կորստից հետո Հայաստանի անվտանգության ոլորտը զգալիորեն թուլացել է, և գործող իշխանությունն ի վիճակի չէ նոր պայմաններ ստեղծել երկրի պաշտպանության համար։ Այդ մասին հայտարարել է ՀՀ պաշտպանության նախկին փոխնախարար Արտակ Զաքարյանը՝ Երևանում "Առաջիկա ընտրությունների երկարաժամկետ հետևանքները" թեմայով քննարկման ժամանակ։

Զաքարյանի խոսքով ՝ ներկայիս պայմաններում Ադրբեջանը փորձում է Հայաստանից ստանալ հնարավոր ամեն ինչ՝ հայկական իշխանությունների զիջումների միջոցով: "Եվ այն ամենը, ինչ նրանց չհաջողվեց ստանալ 2020 թվականի նոյեմբերի 9-ի եռակողմ հայտարարության արդյունքում, նրանք կփորձեն ձեռք բերել ընթացիկ տարվա օգոստոսի 8-ի Վաշինգտոնյան պայմանավորվածությունների միջոցով ։ Վերջին 5 տարիների ընթացքում երկրում բացակայում է անվտանգության ապահովման հստակ հայեցակարգը։ Դա կապված է ղեկավարության ոչ կոմպետենտության հետ, որը մինչեւ վերջ չի գիտակցում, թե ով է Հայաստանի իրական հակառակորդը, եւ ինչ սպառնալիքներ են կանգնած Զինված ուժերի առջեւ", - կարծում է նախկին պաշտոնյան։

Արդյունքում, ըստ Զաքարյանի, հայկական պետականության գոյությունն այսօր, ըստ էության, կախված է Հարավային Կովկասում գերտերությունների դիմակայության ելքից: Այդ առնչությամբ քաղաքական գործիչը նշել է երկրի պաշտպանության եւ անվտանգության ոլորտում հնարավորինս սեղմ ժամկետում լայնածավալ աշխատանք իրականացնելու անհրաժեշտությունը, ցանկալի է՝ առաջիկա հինգ տարիներին ՝ մինչեւ հաջորդ քաղաքական ցիկլի ավարտը: "Դրա համար անհրաժեշտ է հանրային համախմբում, ինչպես նաև հասկանալ պաշտպանունակ և մարտունակ բանակի տարբերությունները, որոնք այսօր մանիպուլացնում է վարչապետ Նիկոլ Փաշինյանը", - կարծում է պաշտպանության նախկին փոխնախարարը:

Բացի այդ, ինչպես շարունակել է նա, անհրաժեշտ է բացահայտել զինված ուժերի առջեւ ծառացած իրական խնդիրները եւ նրանց նախապատրաստել նոր մարտահրավերների ։ "Կարևոր է նաև բանակի օպերատիվ կառավարման նոր մարտավարությունների և համակարգերի ներդրումը, ինչպես նաև ձեռք բերվող սպառազինության արդյունավետությունը և տարածաշրջանային ուժերի հետ դրանց համադրելիությունը գնահատելը", - հավելել է Զաքարյանը:

Քաղաքական գործիչը վստահ է, որ առկա իրողություններում պաշտպանության ոլորտում պետական ներդրումները պետք է համապատասխանեն երկրի առջև ծառացած մարտահրավերներին: Առաջիկա ընտրությունները, ըստ Զաքարյանի, նաեւ հնարավորություն են ընձեռում ձերբազատվել գործող իշխանությունների վտանգավոր հավակնոտ PR արշավներից եւ կենտրոնանալ քաղաքացիների միջեւ փոխադարձ հարգանքի ստեղծման, դատական համակարգի վերականգնման եւ ընդդիմության ու իշխող ուժի միջեւ առողջ հարաբերությունների հաստատման վրա: "Այսօր բոլոր երկրները ստեղծված իրավիճակն օգտագործում են իրենց շահերի համար, մինչդեռ, Հայաստանը շարունակում է կորցնել իր ռեսուրսները, մեծանում է հասարակության պառակտումը։ Առաջիկա ընտրությունները կարող են դառնալ վերջին հանգրվանը, որը մեզ թույլ կտա կանգնեցնել մեր երկրի համար այս խայտառակ գործընթացը", - եզրափակել է Զաքարյանը:

Հիշեցնենք, որ խորհրդարանում բյուջետային լսումների ժամանակ ՀՀ վարչապետը հայտարարել էր, որ անհրաժեշտ է մարտունակ բանակի հայեցակարգը փոխարինել պաշտպանունակ բանակի հայեցակարգով: Այսինքն, ինչպես պարզաբանել է Փաշինյանը, բանակը պետք է պատրաստ լինի պաշտպանել երկրի տարածքային ամբողջականությունը, ինքնիշխանությունը և քաղաքացիների անվտանգությունը։ Բացի այդ, ավելի վաղ վարչապետը հայտարարել էր պարտադիր զինվորական ծառայության ժամկետը 2 տարուց 1,5 տարի կրճատելու մասին: Փորձագետներն ու Փաշինյանի քաղաքական ընդդիմախոսները հայտարարել են, որ որոշումը չի բխում բանակում դրական փոփոխությունների հասնելու ձգտումից, այլ իշխող կուսակցության լավ մտածված նախընտրական քայլ է: Բացի այդ, այսպիսով, վարչապետ Փաշինյանը փորձում է հետագայում առաջ տանել Ադրբեջանի հետ խաղաղության իր կեղծ օրակարգը: