Երևանն ու Վաշինգտոնը դեռ քննարկում են Սյունիքում «Trump Route»-ի վարձակալության ժամկետը

Արմինֆո.  Երևանն ու Վաշինգտոնը քննարկում են «Trump Route» վարձակալության հանձնման երկու սցենար՝ 49 կամ 99 տարով։ Այդ մասին նոյեմբերի 14-ին հայտարարել է վարչապետ Նիկոլ Փաշինյանը՝ "Խաղաղության խաչմերուկներ. տարածաշրջանային հաղորդակցության եւ համագործակցության զարգացում" խորագրով խորհրդաժողովի ժամանակ։

"Ժամկետները կապված են ներդրումների և դրանց վերադարձելիության հետ, և ներդրողը պետք է երաշխիքներ ունենա,  որ հետ կստանա ներդրված միջոցները որոշակի մարժայի հետ միասին", - պարզաբանել է Փաշինյանը:

Օրինակ, ոչ մի ներդրող ներդրում չի անի, եթե Երևանը որոշի 5 տարի ժամկետով վարձակալության հանձնել այդ հողերը, քանի որ իրատեսական չէ այդ ժամկետում ապահովել ներդրումների վերադարձը, ընդգծել է նա ։

Այդ առնչությամբ, ինչպես շարունակել է ՀՀ վարչապետը, հայկական կողմն այդ քննարկումներում քաղաքական բաղադրիչ չի տեսնում, դրանք զուտ ֆինանսական բնույթ են կրում ։ Վարձակալության ժամկետները կախված են բացառապես այն բանից, թե որ ժամանակահատվածում ներդրումները որոշակի շահույթով կփոխհատուցվեն, վստահեցրել է Նիկոլ Փաշինյանը։

Բացի այդ, ինչպես հիշեցրել է վարչապետը, Trump Route-ն իրականացվելու է հայ-ամերիկյան կոնսորցիումի կողմից, իսկ բուն նախագիծը "բազմապրոֆիլ" է: Այդ առումով կարող է անհրաժեշտություն առաջանալ «որոշ դեպքերում կամ բոլոր դեպքերում» հրավիրել «պրոֆեսիոնալ ներդրողի, ով գիտի, թե ինչպես ներդնել և ինչպես շահույթ ստանալ»:

"Դեռ օգոստոսի 8-ի Վաշինգտոնյան հռչակագրում ասվում է, որ ՀՀ-ն եւ ԱՄՆ-ն կարող են քննարկել նախագծում երրորդ կողմի ներգրավումը", - նշել է Փաշինյանը:

Չնայած Trump Route-ը հայ-ամերիկյան նախագիծ է, դրա հետ անմիջական կապ ունի նաև Ադրբեջանը: Նախագիծը լիարժեք կլինի միայն այն բանից հետո, երբ երկաթուղին շարունակվի նաև Ադրբեջանի տարածքով, նշել է նա։

Հիշեցնենք, որ օգոստոսի 8-ին Հայաստանի վարչապետ Նիկոլ Փաշինյանը և Ադրբեջանի նախագահ Իլհամ Ալիևը Վաշինգտոնում ստորագրել են "խաղաղության մասին" յոթ կետից բաղկացած համատեղ հռչակագիր: Այն նախատեսում է համատեղ դիմում Եվրոպայի անվտանգության եւ համագործակցության կազմակերպությանը (ԵԱՀԿ) ԵԱՀԿ Մինսկի գործընթացի եւ դրա հետ կապված կառույցների դադարեցման մասին, ինչպես նաեւ Հայաստանի տարածքով տրանսպորտային միջանցքի ստեղծում, որը կմիացնի Ադրբեջանը իր նախիջեւանյան էքսկլավին: TRIPP նախագիծը (Trump Route for International Peace and Prosperity, թարգմանաբար ՝ «Միջազգային խաղաղության և բարգավաճման Թրամփի ճանապարհ», Հայաստանի հարավում գտնվող 42 կմ ճանապարհ, որի կառավարումը 99 տարով կտան ԱՄՆ-ին), փորձագետների կարծիքով, կարող է էապես փոխել աշխարհաքաղաքական իրավիճակը Հարավային Կովկասում: