Փաշինյանը Վաղարշապատի ընտրությունների արդյունքները "կարևոր լիցք" է համարել Մայր Աթոռ Սուրբ Էջմիածնի «ազատագրման» գործընթացում

Արմինֆո.  Վարչապետ Նիկոլ Փաշինյանը վաղ առավոտից սոցցանցի հրապարակմամբ արձագանքել է Հայաստանի հոգևոր մայրաքաղաք Վաղարշապատի ընտրությունների արդյունքներին: Նա նաև տեսանյութ է հրապարակել, որտեղ նստած է աշխատասենյակում և լսում է «հեղափոխական» երգը, որի կրկներգում երգվում է. «Ես մենակ չեմ, մենակ չեմ, մենակ չեմ, քայլում եմ, քայլում եմ»:

Արմավիրի մարզի Վաղարշապատ խոշորացված համայնքում ավագանու ընտրությունները տեղի են ունեցել նոյեմբերի 16-ին: ԿԸՀ նախնական արդյունքների համաձայն, կառավարող "Քաղաքացիական պայմանագիր" կուսակցությունը հավաքել է ձայների 48,5 տոկոսը ՝ ստանալով համայնքի ավագանիում մեծամասնություն և միանձնյա իշխանություն ձևավորելու հնարավորություն: Երկրորդ տեղում է "Հաղթանակ" դաշինքը (մտնում են "Առաջ" և "Դաշնակցություն" կուսակցությունները)՝ 31,9 տոկոսով, երրորդում՝ "Մայր Հայաստան" դաշինքը (5,4 տոկոս):

«Վաղարշապատ խոշորացված համայնքի սիրելի ընտրողներ, խոնարհվում եմ բոլորիդ առաջ եւ շնորհավորում եմ բոլորիդ նախեւառաջ՝ ժողովրդավարական ընտրությունների առիթով։

Ձեր ընտրությամբ մի քանի կարեւոր արձանագրում արեցիք․

1․ Դուք համայնքի ղեկավար ընտրեցիք «Քաղաքացիական պայմանագիր» կուսակցության թեկնածու Արգիշտի Մեխակի Մեխակյանին, հաստատելով, որ խաղաղ, բարեկեցիկ եւ ժողովրդավարական Հայաստանի Հանրապետությունը մեր նահատակների հիշատակը հավերժացնելու լավագույն միջոցն է, նրանց հիշատակին մատուցվող մեծագույն տուրքը։

2․ Աներկբա աջակցություն ցուցաբերեցիք մեր պետականությունը, անկախությունը, ինքնիշխանությունը, ազատությունը ուժեղացնելու «Քաղաքացիական պայմանագիր» կուսակցության ռազմավարությանը։

3․ Ձեր ընտրությամբ կարեւոր լիցք տվեցիք մեր սրբության սրբոցը՝ Մայր Աթոռ Սուրբ Էջմիածինը Կտրիճ Ներսիսյանից ազատելու գործընթացին։

4․ Գնահատեցիք նախորդող շրջանում «Քաղաքացիական պայմանագրի» կատարած աշխատանքը Ձեր համայնքում եւ ներողամիտ գտնվեցիք թույլ տրված սխալների համար։

Ուզում եմ այդ սխալների համար ներողություն խնդրել բոլորիցդ։

Շնորհավորում եմ Արգիշտի Մեխակյանին Վաղարշապատ խոշորացված համայնքի ղեկավար ընտրվելու առիթով եւ վաղարշապատցիներին եմ շնորհավորում համեստ, բայց որպես կառավարիչ իր աշխատանքի արդյունավետությունը ապացուցած Մեխակյանին ընտրելու առիթով։

«Քաղաքացիական պայմանագիր» կուսակցության իմ բոլոր գործընկերներին եմ շնորհավորում, ՀՀ բոլոր քաղաքացիներին եմ շնորհավորում 2026 թվականի համապետական ընտրությունների այս հնչուն նախերգանքի համար։

Հայաստանի Հանրապետության ժողովուրդը հաղթելու է 2026 թվականի խորհրդարանական ընտրություններում», - գրել է վարչապետը։