ԳԴՀ կանցլերը՝ Հայաստանի ժողովրդավարական զարգացման մասին․ կա խանգարող հանգամանք, որը դարձել է բնական․ ժողովրդավարության թշնամիները, մասնավորապես, Ռուսաստանը, կիրառում են հիբրիդային միջոցներ

Արմինֆո. Գերմանիայի Դաշնային Հանրապետության դաշնային կանցլեր Ֆրիդրիխ Մերցը կարծում է, որ Հայաստանի ժողովրդավարական զարգացմանը խանգարում են «ժողովրդավարության թշնամիները, մասնավորապես, Ռուսաստանը», որոնք հիբրիդային միջոցներ են կիրառում: Այդ մասին Մերցը հայտարարել է դեկտեմբերի 9-ին Բեռլինում ՀՀ վարչապետի Նիկոլ Փաշինյանի հետ համատեղ ճեպազրույցի ժամանակ:

Ինչպես նշել է Գերմանիայի կանցլերը, վարչապետ Փաշինյանն իրեն ասել է, թե ինչ պատկերացում ունի Հայաստանի զարգացման, ժողովրդավարության բարեփոխումների մասին, երկրի և հասարակության մասին, «որն ուզում է խաղաղ ապրել իր հարևանների հետ և բարեկեցություն կառուցել»։

«Այդպիսի ժողովրդավարական զարգացման մաս է կազմում խորհրդարանական ընտրությունը, որը հունիսին տեղի է ունենալու Հայաստանում։ Խաթարող մի հանգամանք կա, որը բնական է դարձել, որտեղ ժողովրդավարության թշնամիները հիբրիդային եղանակով միջոցներ են ձեռնարկում, հատկապես՝ Ռուսաստանը փորձում է ինչ-որ վախեր սերմանել Եվրամիության և արևմուտքի հետ սերտացման, հարաբերությունների մերձեցման մասին և սխալ տեղեկություններ տարածել Եվրամիության արժեքների մասին՝ սաբոտաժ, ապատեղեկատվություն, դրոններ, ԱԹՍ-ներ, այդ եղանակով փորձում են ապատեղեկատվություն տարածել և ապակայունացնել իրավիճակը։ Դա տեղի է ունենալու, իհարկե։ Տեղի է ունենում նաև Ուկրաինայում, տեսնում ենք ամեն օր ավերածությունների տեսքով։

Եվ վերջում ցանկանում եմ ասել, որ ռուսական այդ ագրեսիոն պատերազմը պետք է կանգ առնի, կանգնեցվի, և այս օրերին մենք ինտենսիվորեն զբաղվում ենք այդ հարցով, որպեսզի արդարացի և երկարատև խաղաղություն հաստատվի։

Գերմանիան հստակ ուղեգիծ ունի, առանց Ուկրաինայի ու առանց եվրոպացիների հնարավոր չէ իրենց մասին որոշում կայացնել, և պարտադրված, թելադրված խաղաղություն չպետք է լինի Կիևի համար», - ասել է Մերցը։

Այդ համատեքստում, ինչպես շարունակել է կանցլերը, իրենք Փաշինյանի հետ խոսել են համատեղ ծրագրերի մասին, թե՝ ինչպես կարող է Գերմանիան նպաստել Հայաստանի դիմակայունությանը։ «Մեզ համար ինքնաբերաբար պարզ է, որ մենք ցանկանում ենք օգնել հիմնական հարցերում, որոնք վերաբերում են ինքնիշխանությանը, ամրացնել Հայաստանի անվտանգությունն ավելի լայն օրակարգով», - հայտարարել է ԳԴՀ դաշնային կանցլերը։