Երևանի կենտրոնում խանութը փակելու Փաշինյանի հրահանգի հետքերով. ՊԵԿ-ը պարզաբանում է ներկայացրել տնտեսվարողի վերաբերյալ, վերջինս կարևորել է պաշտոնապես սահմանված կանոնների առկայությունը

Արմինֆո.  Պետական եկամուտների կոմիտեն ներկայացրել է դեկտեմբերի 18-ի ՀՀ կառավարության նիստում վարչապետի կողմից նշված հարկ վճարողի նկատմամբ իրականացված օպերատիվ-հետախուզական միջոցառումների և հարկային վարչարարության վերաբերյալ տեղեկատվություն։ Պարզաբանումներով հանդես է եկել նաև տնտեսվարողը՝ ի դեմս REDstore խանութների ցանցի։

«Փակեք այդ խանութը, գտեք միջոց, փակեք այդ խանութը, ես կստուգեմ, այդ խանութում առևտուր չպետք է արվի, ես անձնական պատասխանատվություն եմ ստանձնում և ամեն օր կգնամ այնտեղ: Քանի դեռ ես անձնական թույլտվություն չեմ ստացել, այդ խանութը չպետք է բացվի: Դուք անձամբ կտեղեկացնեք այդ մասին: Հենց որ ես իմանամ նման խանութի մասին (ես ամբողջ պատասխանատվությունը վերցնում եմ ինձ վրա), այն կփակվի, առևտուրը կարգելվի ։ Մինչև անձնական թույլտվություն չտամ, առևտուրը կարգելվի»,- դեկտեմբերի 18-ին կառավարության նիստում հայտարարել էր վարչապետ Նիկոլ Փաշինյանը՝ դիմելով ՊԵԿ նախագահ Էդվարդ Հակոբյանին:

Ըստ ՊԵԿ տեղեկատվության, խոսքը վերաբերում է «Ն․ Ս․» ընկերությանը։ «ՊԵԿ հետաքննության և օպերատիվ հետախուզության վարչության պետի 2024 թվականի սեպտեմբերի 12-ի որոշման համաձայն՝ «Ն․ Ս․» ընկերության նկատմամբ ձեռնարկվել են համալիր օպերատիվ-հետախուզական միջոցառումներ։ Արդյունքում պարզվել է, որ ընկերությունում առկա ստվերային շրջանառությունից չի հաշվարկվել և չի վճարվել 95․7 մլն դրամի հարկային պարտավորություն։ Բացի այդ, ձեռնարկված օպերատիվ-հետախուզական միջոցառումների ընթացքում ստացվել են տեղեկություններ, որ ընկերության կողմից փորձ է կատարվել մաքսանենգ ճանապարհով ներմուծել 97 հատ տարբեր տեսակի բջջային հեռախոսներ, որը կանխվել է։ 

Ձեռնարկված օպերատիվ-հետախուզական միջոցառումների շրջանակում պարզվել է նաև, որ ընկերությունն իր գործունեության մի մասը շարունակել է իրականացնել այլ հարկ վճարողի անվամբ՝ հարկային «բարենպաստ» պայմաններից օգտվելու նպատակով։ Արդյունքում, հարկ վճարողի կողմից պետությանը պատճառվել է վնաս՝ 64․5 մլն դրամի չափով։
 

Նկատի ունենալով վերոգրյալը՝ առերևույթ հանցագործության հատկանիշներով 2024 թվականի հոկտեմբերի 18-ին հաղորդում է ներկայացվել ՀՀ Քննչական կոմիտե, որտեղ հոկտեմբերի 22-ին ՀՀ քրեական օրենսգրքի 290-րդ հոդվածի 3-րդ մասի 2-րդ կետով նախաձեռնվել է քրեական վարույթ։ Քրեական վարույթի շրջանակում կատարված խուզարկություններով հայտնաբերվել է 90 հատ «Apple iPhone 16» մոդելի բջջային հեռախոս, որոնց մասով ընկերությունը չի ունեցել օրինական ճանապարհով ներմուծման, ինչպես նաև ձեռքբերման փաստաթղթեր։ Բացի այդ, պարզվել է, որ ընկերության կողմից օրինական ճանապարհով ներմուծված բջջային հեռախոսներից 277 հատն իրացվել է առանց փաստաթղթավորման։ Ի հայտ եկած նոր փաստական տվյալների հիմքով՝ ՊԵԿ հետաքննության և օպերատիվ հետախուզության վարչության աշխատակիցների կողմից հաշվարկվել է չվճարված հարկային պարտավորությունների չափը, որը կազմել է 46.1 մլն դրամ, այնուհետև հաշվարկն ուղարկվել է ՀՀ Քննչական կոմիտե։
 

ՊԵԿ հետաքննության և օպերատիվ հետախուզության վարչություն 2025 թվականի հոկտեմբերին կրկին օպերատիվ տեղեկություններ էին ստացվել այն մասին, որ ընկերությունը շարունակում է իր տնտեսական գործունեության իրական ծավալները թերհայտարարագրել, ուստի ՀՀ ՊԵԿ ՀՕՀ վարչության պետի 2025 թվականի հոկտեմբերի 28-ի որոշման համաձայն, հարկ վճարողի նկատմամբ ձեռնարկվել են համալիր օպերատիվ-հետախուզական միջոցառումներ, որոնք ներկայում ընթացքի մեջ են։

Հարկային վարչարարության արդյունքները

Ընկերությունում գրանցման օրվանից՝ 2019 թվականի մայիսի 10-ից, առ այսօր հարկային վարչարարության շրջանակում, մասնավորապես, իրականացվել է 23 թեմատիկ ստուգում, արձանագրվել է 5․8 մլն դրամի չափով տուգանք, որից՝ 4․2 մլն դրամի չափով տուգանքը 2025 թվականի ընթացքում: Միաժամանակ, իրականացվել է երկու համալիր ստուգում, որից մեկն ավարտված է, մյուսը՝ ընթացքում է։ Ավարտված համալիր ստուգման ակտով արձանագրվել է 250 հազար դրամի չափով տուգանք, ստուգման ընթացքում ներկայացվել են նաև 2․5 մլն դրամի չափով ճշտված հաշվարկներ: Իսկ ընթացքում գտնվող համալիր հարկային ստուգման իրականացման համար հիմք է հանդիսացել հարուցված քրեական գործի շրջանակում քննիչի որոշումը: Ստուգումը ներկայում կասեցված է․ կատարվում են լրացուցիչ հարցումներ:

Վերլուծական գործիքակազմի կիրառման արդյունքում, իրացման շրջանառության թերհայտարարագրման հնարավոր ապրանքային մնացորդների, ինչպես նաև փոխադարձ համաձայնությամբ գործելու հիմքով փոխկապակցվածության իրավախախտումների մասով՝ 2022-2024 թվականների ընթացքում կազմվել են չորս տեղեկանքներ, որոնց հիմքով առկա է հարուցված քրեական գործ:
 

ՊԵԿ-ը հիշեցնում է, որ  հարկային հսկողության շրջանակում  հարկային ստուգումների պլանավորումն իրականացվում է ռիսկերի վրա հիմնված հարկային ստուգումների համակարգերի միջոցով: Նախապես մշակված ռիսկային չափանիշների հիման վրա, ստուգման ենթակա հարկ վճարողները գնահատվում են, որի արդյունքում ստուգումներն ուղղվում են դեպի այն ոլորտները և հարկ վճարողները, որոնք առավել ռիսկային են: Նշենք որ, ռիսկային հարկ վճարողների ընտրությունը կատարվում է՝ հիմք ընդունելով ինչպես ՊԵԿ տեղեկատվական շտեմարանում առկա տեղեկատվությունը, այնպես էլ երրորդ անձանցից ստացված տեղեկատվությունը: Տնտեսվարողների հարկային կարգապահության վերաբերյալ անհատական ուսումնասիրությունների ընթացքում հաշվի են առնվում իրենց կողմից հարկային մարմին ներկայացված տվյալները, ինչպես նաև նրանց կայքէջերում հրապարակված տեղեկատվությունը:
 

Միաժամանակ, Պետական եկամուտների կոմիտեն շարունակում է նպատակային և հետևողական աշխատանքներ տանել տնտեսվարողների շրջանում՝ հարկային կարգապահության և  վարչարարության արդյունավետության բարձրացման, ինչպես նաև հարկային պարտավորությունների կատարման բարելավման ուղղությամբ», - ասվում է ՊԵԿ-ի պարզաբանման մեջ։

«Էլեկտրոնիկայի ոլորտում տարածված է միեւնույն ապրանքի համար տարբեր անվանական արժեք կիրառելու պրակտիկան՝ կախված վճարման եղանակից: Տարբերությունը պայմանավորված է անկանխիկ վճարումների դեպքում բանկերի կողմից գանձվող միջնորդավճարներով: Ընդ որում, մենք նշում ենք, որ 300 000 դրամից ավելի վճարումները կատարվում են տերմինալի միջոցով, ինչն ապահովում է լիակատար թափանցիկություն», - իր հերթին ասվում է REDstore խանութների ցանցի հայտարարության մեջ:

«REDstore-ը լիովին կիսում է պետության դիրքորոշումը թափանցիկության և ֆինանսական հարաբերությունների կարգավորման վերաբերյալ: Միևնույն ժամանակ, մենք կարևորում ենք հստակ և պաշտոնապես սահմանված կանոնների առկայությունը՝ այս ոլորտում միանշանակ մոտեցում ապահովելու համար: Մեր նպատակն է գործել օրենքի շրջանակներում, պաշտպանել մեր հաճախորդների իրավունքները և նպաստել կայուն և կանխատեսելի գործարար միջավայրի ձևավորմանը", - նշել են հայտարարության հեղինակները: