Եվրախորհրդարանում կքննարկեն արտաքին միջամտության դեմ պայքարում Հայաստանին աջակցություն ցուցաբերելու վերաբերյալ բանաձևի ընդունումը

Արմինֆո.Ապրիլի 27-30-ը Եվրոպական խորհրդարանում (Եվրախորհրդարան) տեղի կունենան քննարկումներ Հայաստանում հունիսի խորհրդարանական ընտրություններին ընդառաջ արտաքին միջամտության դեմ պայքարում երկրին աջակցություն ցուցաբերելու վերաբերյալ բանաձևի ընդունման շուրջ: Այդ մասին հաղորդում է Եվրախորհրդարանի մամուլի ծառայությունը։

Նշվում է, որ ապրիլի 28-ին Եվրոպական հանձնաժողովի եւ ԵՄ Խորհրդի ներկայացուցիչների հետ լիագումար քննարկումների ընթացքում, ինչպես նաեւ ապրիլի 30-ին ընդունվելիք ուղեկցող բանաձեւում Եվրախորհրդարանի պատգամավորները կընդգծեն արտաքին միջամտությունից զերծ քվեարկության անհրաժեշտությունը եւ մտահոգություն կհայտնեն "ապատեղեկատվություն տարածելու եւ քվեարկության արդյունքների վրա ազդելու Մոսկվայի փորձերի առնչությամբ":

"Բացի այդ, ակնկալվում է, որ Եվրախորհրդարանը կոչ կանի ակտիվացնել ջանքերը Հայաստանի ընդհանուր ժողովրդավարական կայունության ամրապնդման ուղղությամբ", - հավելել են Եվրախորհրդարանում:

Այս առնչությամբ հիշեցվում է, որ ԵՄ-ը վերջերս գործարկել է նոր քաղաքացիական առաքելություն ՝ աջակցելու Հայաստանի իշխանություններին կարողությունների զարգացման և բազմամակարդակ սպառնալիքներին հակազդման գործում, ինչպիսիք են արտաքին տեղեկատվական մանիպուլյացիան և միջամտությունը (FIMI), կիբերհարձակումները և անօրինական ֆինանսական հոսքերը:

Նշենք, որ ապրիլի 21-ին ԵՄ արտաքին գործերի նախարարների խորհուրդը հավանություն է տվել Հայաստան քաղաքացիական նոր առաքելություն ուղարկելու որոշմանը: Այն նախատեսված է երկու տարի ժամկետով: Տեղեկատվության համաձայն՝ "առաքելությունը կամրապնդի Հայաստանի դիմադրողականությունը հիբրիդային սպառնալիքների նկատմամբ ՝ ռազմավարական, գործնական խորհրդատվություն և աջակցություն տրամադրելով նախարարություններին և անվտանգության մարմիններին": Այդ խորհրդատվությունները կկենտրոնանան քաղաքականության մշակման, տեղեկատվության արտաքին մանիպուլյացիաների, կիբեռհարձակումների, ինչպես նաև անօրինական ֆինանսական հոսքերի բացահայտման և արձագանքման վրա:

Առաքելությունը նաև կգնահատի, թե ինչ է անհրաժեշտ Հայաստանի անվտանգության ներուժի զարգացման համար, որպեսզի երկիրը կարողանա առավել արդյունավետ կերպով բացահայտել և արձագանքել հիբրիդային սպառնալիքներին ՝ ԵՄ մեթոդաբանություններին և չափանիշներին համապատասխան:

Հիշեցնենք, որ ավելի վաղ "Ազատություն" ռադիոկայանը հայտնել էր, որ իրենց տրամադրության տակ է հայտնվել ՀՀ ԱԳ նախարար Արարատ Միրզոյանի նամակը Բրյուսելին, որում նա "խնդրել էր արագ արձագանքման խումբ ուղարկել Երեւան ՝ կրեմլյան ապատեղեկատվությանը եւ Հայաստանի խորհրդարանական ընտրություններին ռուսական միջամտությանը հակազդելու համար, ապա, հնարավոր է, ավելի մշտական քաղաքացիական առաքելություն": Այդ կապակցությամբ հիշեցվել է, որ ԵՄ-ն մոտ 20 հոգուց բաղկացած նմանատիպ խումբ էր ուղարկել Քիշնև՝ անցած տարվա խորհրդարանական ընտրությունների ժամանակ, "որպեսզի օգնի մոլդովական իշխանություններին բացահայտել և հակազդել սոցիալական ցանցերում Ռուսաստանից եկող ապատեղեկատվությանը": Հավելենք, որ ավելի վաղ ԵՄ գլխավոր դիվանագետ Կայա Կալլասը հայտարարել էր Հայաստանին 15 մլն եվրո հատկացնելու մասին ՝ "ռուսական քարոզչությանը հակազդելու համար":