Ի՞նչ եղան Հայաստանի 57 քկմ ինքնիշխան տարածքները․ ընդդիմադիր պատգամավորի հարցին պատասխանել է ԱԺ խոսնակը

Արմինֆո.Հայաստանի տարածքը միշտ կազմել է 29 743 քառակուսի կիլոմետր, իսկ նախկինում տարածվող 29 800 քառակուսի կիլոմետր թիվը կլորացված էր։ Այդ մասին օգոստոսի 11-ին ԱԺ ամբիոնից հայտարարել է ԱԺ նախագահ Ռուբեն Ռուբինյանը՝ մեկնաբանելով ԱԺ ընդդիմադիր "Հայաստան" խմբակցության պատգամավոր Արթուր Խաչատրյանի հայտարարությունը։

Պատգամավորը, մասնավորապես, նշել է, որ ժամանակին դպրոցում իրենց սովորեցրել են, որ Հայաստանի տարածքը 29 800 քառակուսի կիլոմետր է, իսկ այժմ Հայաստանի իշխանությունները հնչեցնում են 29 743 քառակուսի կիլոմետր թիվը: "Երբ կլորացնում ես 29 743-ը, ստացվում է 29 700, ուստի օրինաչափ հարց է առաջանում․ ու՞ր են Հայաստանի Հանրապետության 57 քառակուսի կիլոմետր ինքնիշխան տարածքները",- ասել է Արթուր Խաչատրյանը, ենթադրություն հայտնելով, որ, հնարավոր է, Ադրբեջանին հանձնվի Տիգրանաշենը։ Խաչատրյանը նաև նշել է, որ և Հայաստանի հանրագիտարանում, և ԽՍՀՄ հանրագիտարանում խոսքը 29 800 քառակուսի կիլոմետր տարածքի մասին է:

Մինչդեռ, Ռուբինյանը, հղում անելով 2005 թվականին հաստատված Հայաստանի Հանրապետության հողային ֆոնդի առկայության և բաշխման մասին զեկույցին, նշել է, որ երկրի տարածքը միշտ կազմել է 29 743 քառակուսի կիլոմետր:  Հանրագիտարանում, գուցե և, վերնագրում կլորացված թիվ կա, բայց՝ ոչ պակաս։ Նրա խոսքով, 2005 թվականին, երբ ՀՅԴ - ն մտավ կառավարող կոալիցիա, ՀՀ կառավարության կողմից հաստատված հողային ֆոնդի մասին զեկույցում Հայաստանի տարածքը նշված էր որպես 2 միլիոն 974 հազար 300 հեկտար, որը համապատասխանում է 29 հազար 743 քառակուսի կիլոմետրի: Ռուբինյանը հավելել է, որ նույն ցուցանիշը ներկայացվել է նաև 2010 և 2015 թվականների համապատասխան փաստաթղթերում։

ԱԺ նախագահը հիշատակել է նաեւ Ալմա-Աթայի հռչակագիրը, նշելով, որ դրանով նախկին խորհրդային հանրապետությունների միջեւ գոյություն ունեցող վարչական սահմանները անկախացումից հետո դարձել են միջպետական սահմաններ: "Այնտեղ սևով սպիտակի վրա գրված է, որ գոյություն ունեցող միջհանրապետական սահմանները դառնում են միջպետական սահմաններ։ Սա նշանակում է, որ ինչ սահմաններ որ գոյություն են ունեցել այդ պահին Հայկական Խորհրդային Սոցիալիստական Հանրապետության և Ադրբեջանական Խորհրդային Սոցիալիստական Հանրապետության միջև, դրանք դառնում են միջպետական սահմաններ", - ասել է Ռուբինյանը։

Նրա խոսքով՝ Հայաստանի 29 743 քառակուսի կիլոմետր տարածքի ճանաչումը նույնպես բխում է այս տրամաբանությունից։ Ռուբինյանը հակասություն է տեսել նաև ընդդիմադիր պատգամավորի դիրքորոշումներում, ըստ որի, մի կողմից՝ 1991թ. Ալմա-Աթայի հռչակագրի վավերացումը չի դիտարկվում որպես Լեռնային Ղարաբաղն Ադրբեջանի մաս ճանաչելուն ուղղված քայլ, իսկ մյուս կողմից՝ 2022թ. Պրահայի հռչակագիրը, որում կողմերը հաստատել են միմյանց տարածքային ամբողջականության ճանաչումը Ալմա-Աթայի հռչակագրի հիման վրա, ներկայացվում է որպես Հայաստանի քաղաքականության փոփոխություն: "Հիմա որոշեք․ արդյոք Ալմա-Աթայի հռչակագրով միմյանց տարածքային ամբողջականության ճանաչումը նշանակում է նախկին խորհրդային հանրապետությունների սահմանների ճանաչում, թե՝ ոչ", - ասել է Ազգային ժողովի խոսնակը