Հայաստանի գյուղերից մեկի բնակիչները փակել են միջպետական նշանակության մայրուղին ՝ լոլիկի իրացմանն առնչվող խնդիրների պատճառով

Արմինֆո.Արարատի մարզի Վերին Դվին համայնքի բնակիչները փակել են Երեւան-Աշտարակ մայրուղին՝ լոլիկի իրացման հետ կապված խնդիրների պատճառով՝ պետական սուբսիդիաների տրամադրման դադարեցումից հետո:

Ակցիայի վայր ժամանած "Ուժեղ Հայաստան" խմբակցության պատգամավոր Հարություն Մնացականյանը լրագրողների հետ զրույցում ուշադրություն է հրավիրել այն հանգամանքին, որ սուպերմարկետներում այդ նույն լոլիկը վաճառվում է 550 դրամով, մինչդեռ, տեղական արտադրողները չեն կարողանում իրենց արտադրանքն իրացնել նույնիսկ 80-100 դրամով: "Մինչդեռ, միայն մեկ ժամ բանջարեղեն հավաքելու համար նրանք ստիպված են բանվորներին վճարել ավելի քան 1000 դրամ։ Իսկ բերքի փոխադրման համար նրանք ծախսում են 20 000 դրամ։ Դրանից հետո բնակիչները լոլիկը փոխադրում են Հովտաշատի շուկա, սակայն այն չի վաճառվում", - պատմել է Մնացականյանը։ Նրա խոսքով՝ ինքը ժամանել է դեպքի վայր, որպեսզի պարզի իրավիճակը և հասկանա, թե ինչ միջոցներ կարելի է ձեռնարկել ստեղծված իրավիճակում: Ակցիայի մասնակիցներից մեկը ցույց է տվել իր մեքենայում բեռնված լոլիկի տուփերը։ Նրա ասելով՝ արդեն երրորդ օրն է՝ բերքը չի կարողանում վաճառել։

Նշենք, որ սա առաջին դեպքը չէ, երբ բնակիչները փակում են ճանապարհը։ Նման ակցիա էր տեղի ունեցել դեռևս այս տարվա հուլիսին։ Այն ժամանակ Հայաստանի էկոնոմիկայի նախարար Գեւորգ Պապոյանը հավաստիացրել էր, որ լոլիկի մթերման հետ կապված խնդիրներ այլեւս չեն առաջանա: Հուլիսի 31-ին նա հիշեցրել էր ՀՀ կառավարության կողմից լոլիկի և տոմատի մածուկի ներկրման ժամանակավոր սահմանափակումների մասին և վստահեցրել, որ պետությունը կաջակցի տեղական լոլիկ արտադրողներին՝ արտահանման կազմակերպման գործում:

Հիշեցնենք, որ ապրիլից Ռուսաստանը հայկական գյուղմթերքի ներկրման փուլային սահմանափակումներ է կիրառում։ Պաշտոնական պատճառ են համարվել սանիտարական և բուսասանիտարական խախտումները և ՀՀ լիազոր գերատեսչությունների կողմից անվտանգության վերահսկողության բացակայությունը: Սահմանափակումների իրական պատճառը, սակայն, Հայաստանի ղեկավարության բացահայտ հակառուսական քայլերն են ՝ Եվրամիության հետ Երևանի  մերձեցման կուրսի ֆոնին։ Այդ "պատժամիջոցներն" արդեն հանգեցրել են ապրանքաշրջանառության կրճատման. 2026 թվականի առաջին հինգ ամիսներին Հայաստանի և Ռուսաստանի միջև փոխադարձ առևտրի ծավալները նախորդ տարվա նույն ժամանակահատվածի համեմատ նվազել են 21,5% - ով։ Դժվարություններ են սկսվել ագրոարտահանման ոլորտում. ամառային պիկ սեզոնին մատակարարումների արգելափակման պատճառով հայկական մրգերի, բանջարեղենի և ծաղիկների արտահանումը 74,5%  կտրուկ անկում է գրանցել: Փորձագետների կարծիքով՝ բիզնեսի ֆինանսական վնասները հաշվվում են տասնյակ միլիոնավոր դոլարներով՝ ստեղծելով հարյուրավոր ջերմոցային և ֆերմերային տնտեսությունների զանգվածային սնանկացման սպառնալիք: